Сәкен Майғазиев анасының тілегін орындады: "Жүрегімді ауыртатыны — көз алдымда әлсіреп бара жатқаны" (ВИДЕО)
Танымал әнші Сәкен Майғазиев ұлына үйлену тойын жасауының басты себебін айтты. Оның сөзінше, бұл шешімді қабылдауға анасының өтініші түрткі болған.
Ана аманаты
Сәкеннің айтуынша, екі ай бұрын анасы оған терең мазмұндағы сөздерін жеткізген:
"Көзіңмен көріп жүрсің, жасарғаным шамалы. Күн санап әлсіреп барамын. Енді мені көп күттірмей, Әділетті үйлендіріңдер. Бұл — менің аманатым", — деген екен.
Қарт ана кейін қалжыңдап:
"Өзім үйлен десем де, тойға қатыса алмасам ренжімеңдер", — деп әзілдеп қойған.
"Жаныма батады…"
Сәкен Майғазиев Instagram парақшасында былай деп жазды:
"Анашым, сіздің жүректен шыққан ақ тілегіңізді Алла қабыл етсін. Жасы 89-да болса да, үнемі 94-темін деп айтып отырады. Қазір көз алдымда әлсіреп бара жатқаны жүрекке ауыр тиеді. Бір бөлмеден екінші бөлмеге әрең жетіп жүргенін көру — жаныңды ауыртады".
Әнші сондай-ақ, тойдан кейін ұлы мен келінін ауылға ертіп барып, ананың батасын алуды жоспарлап отырғанын айтты.
"Келініңіз шәй құйып береді. Алла сізге қуат берсін", — деп түйіндеді ол жазбасын.
Той ақылы трансляцияда өтеді
Айта кетейік, Сәкен Майғазиев ұлының үйлену тойын ақылы онлайн трансляция арқылы көрсетуді шешкен. Тойды көру құны — 1380 теңге.
Желі қолданушылары бұл шешімді әртүрлі қабылдаған.