Украиналық футболшы қазақстандық клубқа қатысты УЕФА-ға шағымданды
Жартылай қорғаушы Евгений Макаренко "Ордабасы" футбол клубына қатысты УЕФА-ға ресми шағым түсірді.
Жалақы төленбегені расталды
Қазақстан ұлттық құрамасының баспасөз қызметкері Ермұхамед Мәулен бұл жағдайды Fonteam YouTube-подкастында растады. Оның айтуынша, клуб басшылығы футболшыға жалақы бойынша есептеспеген.
“Макаренконың әлі күнге дейін еңбекақысын алмағаны анықталды. Ол УЕФА-ға ресми хат жазған. Бұл — өте жағымсыз тәжірибе. Клуб мәселеден хабардар, бірақ шешуге тырыспайды. Көбіне басқарма ауысуын сылтау етіп, бұрынғы келісімшарттар орындалмай қалады. Алайда келісімшарт – күшінде, оны орындау міндет”, – деді Мәулен.
Макаренко – ең жоғары жалақы алған ойыншы
Журналистік деректерге сүйенсек, Макаренко биыл сәуір айында "Ордабасыдан" кеткен. Ол командадағы ең жоғары жалақы алатын футболшы болған. Осыған қарамастан клуб оның алдындағы қаржылық міндеттемелерін орындамады.
Клуб беделіне нұқсан келуі мүмкін
Футболшының УЕФА-ға жүгінуі "Ордабасы" клубы үшін беделдік және қаржылық тәуекел туғызады. Егер Еуропа футбол органдары талапты орынды деп тапса, клубқа айыппұл салынуы немесе халықаралық жарыстардан шеттетілу қаупі де бар.