Криштиану Роналду әлемдік рекордты жаңартып, Мессиден озып кетті (ВИДЕО)
Португалия құрамасының шабуылшысы Криштиану Роналду тағы бір тарихи жетістікті бағындырды. Ол ұлттық құрамалар арасындағы голдар саны бойынша әлемдік рекордты жаңартты.
Криштиану Роналду Германияға қарсы өткен Ұлттар лигасының жартылай финалында (2:1) Португалия құрамасы үшін 137-голын соқты. Бұл нәтиже оны ұлттық құрама сапында ең көп гол соққан футболшы ретінде тағы да биікке шығарды.
Мессиді шаң қаптырып кетті
Аргентина жұлдызы Лионель Месси ұлттық құрамада 112 голмен екінші орында тұр. Осылайша, Роналду басты қарсыласынан 25 голға артық көрсеткішпен алға шықты.
40 жастағы Роналду кәсіби мансабындағы 937-ші голын соқты. Оның ішінде:
- 800 голы – клуб деңгейінде,
- 137 голы – Португалия құрамасы үшін.
Бұл статистика — футбол тарихында сирек кездесетін көрсеткіш.
Финалдағы қарсылас — Испания немесе Франция
Португалия құрамасы Ұлттар лигасының финалында Испания мен Франция арасындағы жеңімпазбен кездеседі. Бұл матчта Роналду тағы бір рет әлемді таңғалдырып, рекордын ұлғайта ала ма — футболсүйер қауым асыға күтуде.