Жозе Моуринью Түркияда жұлдызды команда жасақтап жатыр
Жозе Моуринью "Фенербахче" клубында жаңа дәуірді бастады. Танымал португалиялық бапкер Неймар, Кайл Уокер және Сон Хын Мин сияқты жұлдыздарды командаға тартуға ниетті.
Неймар Еуропаға қайта оралуы мүмкін
33 жастағы бразилиялық вингер Неймар қазір өз елінде — "Сантос" клубында өнер көрсетіп жүр. Дегенмен Еуропаға қайта оралуы ықтимал. Түркиялық Fanatik басылымы және журналист Ягыз Сабунджуоғлуның мәліметінше, "Фенербахче" Неймарға бір жылдық келісімшарт ұсынып, оны бір маусымға командаға шақырып отыр. Шартта ұзартуға мүмкіндік қарастырылған.
Неймардың "Сантоспен" келісімшартында еуропалық клубқа тегін кетуге мүмкіндік беретін арнайы бап бар. Ағымдағы маусымда ол 14 ойында 3 гол соғып, 3 нәтижелі пас берген. "Сантос" жұлдызын сақтап қалғысы келгенімен Моуриньюдің жаңа жобасы Неймар үшін қызықты нұсқа болып тұр.
Кайл Уокер — қорғанысты нығайтатын тәжірибелі ойыншы
"Фенербахченың" назарында тағы бір жұлдыз 35 жастағы ағылшын қорғаушы Кайл Уокер бар. Соңғы маусымды "Милан" сапында жалға ойнаумен өткізген футболшы "Манчестер Ситимен" 2026 жылдың жазына дейін келісімшартқа ие. Алайда түркиялық ұжым ойыншыға ресми ұсыныс жасаған.
Уокер екі жылдық келісімшарт күтуде, ал оның қазіргі нарықтағы бағасы — шамамен 6 миллион еуро. Бұдан бөлек ағылшын қорғаушысы "Сити" клубының клубтық әлем чемпионатына арналған тізіміне енбеген. Бұл оның командадан кету ықтималдығын арттырып отыр.
Сон Хын Мин де Моуринью жобасының бір бөлігі болуы мүмкін
Моуриньюдің "Тоттенхэмде" бірге жұмыс істеген шабуылшысы Сон Хын Мин да Түркияға келуі мүмкін. Португалиялық бапкер кореялық жұлдыздың талантына жоғары баға береді.
Оның қазіргі келісімшарты 2026 жылдың маусымына дейін жалғасқанымен "Фенербахче" жағдайды пайдаланып, ойыншыны сатып алуға ниетті.