Жоспар бойынша оларда “KAZAKHSTAN” жазуы мен ҚФФ логотипі бейнеленеді.
Қазақстан футбол федерациясы жанкүйерлерге арналған жаңа атрибутика әзірлеуде. Мемлекеттік сатып алулар порталында жарияланған ресми мәліметтерге сәйкес, ҚФФ жалпы құны 3 миллион теңгеге 1000 дана мойын орамалын (шарф) сатып алуды жоспарлап отыр. Бұл туралы aladop.kz хабарлады.
Имидждік мақсатта шығарылатын шарфтар акрил жібінен тоқылады. Әр шарфтың өлшемі — 145 × 20 см, екі жақты дизайнмен жасалады. Бір жағында "KAZAKHSTAN" жазуы бейнеленсе, екінші бетінде Қазақстан футбол федерациясының логотипі орналасады. Түстік палитрасы ұлттық құраманың ойын формасына сәйкес болады.
Әр шарфқа 20 × 30 см көлеміндегі ламинацияланған этикетка тіркеледі. Ол арнайы картоннан жасалып, өнімге қосымша эстетикалық әсер береді.
Жеткізу мерзімі — шарт жасалып, алдын ала төлем жүргізілген соң 35 күннің ішінде жүзеге асуы тиіс. Тапсырыс беруші ретінде ҚФФ-ның операциялық департаменті көрсетілген.
Бұл бастама футбол жанкүйерлеріне арналған жаңа бренд элементтерін кеңінен таныстыруға бағытталуы мүмкін. Сонымен қатар, атрибуттар ұлттық құраманы қолдауға үндейтін көрнекі құрал болмақ.