УЕФА турдың үздік сейві үшін дауыс беруді бастады: Шерхан Қалмырза алдыңғы қатарда
18 жастағы “Қайрат” қақпашысы Шерхан Қалмырзаға УЕФА тағы да назар аударды. Оның “Реалға” қарсы ойындағы сейві Чемпиондар лигасының жалпы кезеңінің екінші турындағы үздік сейвтер қатарына енді.
Чемпиондар лигасының ресми Instagram аккаунтында турдың ең үздік сейвіне ашық дауыс беру басталды. Тізімде 4 қақпашы бар – “Галатасарай” қақпашысы Угурджан Чакыр, “Челси” қақпашысы Роберт Санчес, “Аякс” қақпашысы Витезслав Ярош және 18 жастағы “Қайрат” қақпашысы Шерхан Қалмырза.
Дауыс беруде “Қайрат” – “Реал” матчының эпизоды ұсынылған. Бұл сәтте Қалмырза Килиан Мбаппенің соққысын әдемі қайтарып, оның есепті ұлғайтуына жол бермеді.
“Қалмырза, әрине”, “Қалмырза – нағыз сұлтан, Қазақстанның мақтанышы”, “Қалмырза тағы да нағыз қақпашы екенін дәлелдеді”, – деп қазақстандық жанкүйерлер парақшада пікір қалдыруда.
Еске салсақ, матч 0:5 есебімен “Реалдың” пайдасына аяқталды. Чемпиондар лигасының топтық кезеңіндегі келесі ойынды “Қайрат” 21 қазанда өз алаңында өткізеді. Қарсыласы – Кипрдің “Пафосы”.