Жас Шерхан Қалмырзаның сирек кадрлары табылды
«Қайрат» қақпашысы Шерхан Қалмырза бала кезінен телебағдарламаға қатысқаны белгілі болды.
«Шытырман» бағдарламасындағы алғашқы қадамдар
Желіде жарияланған бейнежазбада жас қазақстандық футболшының «Шытырман» бағдарламасына қатысқан сәттері көрсетілген. Кадрларда кішкентай Шерхан өзінің басты жанкүйерлері анасы мен достары екенін айтып береді. Сондай-ақ бейнежазбада оның мадридтік «Реалға» қарсы ойынының үзінділері көрсетілген.
Еуропада көзге түскен қақпашы
18 жастағы алматылық қақпашы Чемпиондар лигасының топтық кезеңінде ерекше өнерімен көпшіліктің назарын аударды. «Қайраттың» негізгі құрамындағы бар-жоғы екінші ойынында Шерхан қақпада сенімді ойын көрсетті.
Алғашқы турда португалиялық «Спортингке» қарсы өткен кездесуде Қалмырза жанкүйерлерге өзін танытты.
Екінші турда мадридтік «Реалға» қарсы өткен ойында жас қақпашы төрт сейв жасады. Оның бірі турдың үздік сэйвтері қатарына енді.
Шерхан Қалмырза бүгінде жанкүйерлер арасында «Қайраттың болашағы» деп аталып жүр. Оның кәсіби деңгейде жылдам өсіп келе жатқаны Қазақстан футболының жаңа толқынына сенім береді.