«Наполи» мен Бельгия құрамасының көшбасшысы Кевин Де Брёйне ауыр жарақат алып, 2026 жылғы ӘЧ іріктеу ойынын жіберіп алуы ықтимал.
Бельгия құрамасының басты жұлдызы, «Наполи» жартылай қорғаушысы Кевин Де Брёйне «Интерге» қарсы өткен кездесуде жамбас бұлшықетін жарақаттап алды.
Футболшы пенальтиден гол соққан сәттен кейін қатты ауырсыну сезінген. Клубтың ресми мәліметінше, 34 жастағы ойыншының жарақаты расымен ауыр, бірақ нақты қалпына келу мерзімі жария етілмеді.
Football Italia ақпаратына сүйенсек, мұндай жарақаттан толық айығу үшін төрт айға дейін уақыт қажет болуы мүмкін.
Италия чемпионатының сегізінші турынан кейін «Наполи» турнир кестесінде бірінші орында.
Команда бас бапкері Антонио Контенің шәкірттері тең ұпай жинаған «Ромадан» тек қосымша көрсеткіштер бойынша озып тұр.
15 қараша күні Қазақстан ұлттық құрамасы өз алаңында Бельгиямен кездеседі. Бірақ соңғы мәліметтерге сәйкес, Кевин Де Брёйне бұл ойында алаңға шықпай қалуы әбден мүмкін.