Түркиялық спорт сарапшысы әрі жазушы Мухаммед Альперен Варол «Қайрат» қақпашысы Темірлан Анарбековтың «Копенгагенге» қарсы ойынын жоғары бағалап, оны Ыстамбұлдың атақты «Галатасарай» клубына шақыру қажет екенін жазды.
«Қайрат» Чемпиондар лигасы матчында даниялық «Копенгагеннен» 2:3 есебімен жеңілгенімен Анарбеков өзінің деңгейін тағы бір мәрте дәлелдеді.
Sofascore статистикалық порталы жас қақпашының ойынын 8.5 бағалап, алматылық команданың ең үздік ойыншысы деп атады.
Түркиялық жазушы әлеуметтік желідегі пікірінде Анарбековтың ерекше әлеуетін атап өтті:
«Алматының „Қайрат“ қақпашысы Темірлан Анарбеков тағы да керемет ойнады. Угурджан Чакырды сатып алардан бұрын да жазғанмын: осы жігітті алыңыздар, „Галатасарайға“ әкеліңіздер! Бұл – таңғаларлық деңгейдегі вундеркинд-қақпашы, жасы небәрі 22-де», – деп жазды Варол X желісінде.
Бұл пікір Түркияда да, Қазақстанда да кең талқыланып жатыр. Жергілікті жанкүйерлер Анарбековтың жасына қарамай, жоғары деңгейде ойнай алатынын және Еуропа клубтары үшін құнды талант екенін айтуда.