17 жастағы қазақстандық шабуылшы Алдияр Нұрғали «Левантенің» жастар командасымен келісімшартқа отыруға жақын.
Бұл туралы ASnews.kz хабарлады.
Қазақстанның U19 жасөспірімдер құрамасының ойыншысы алдағы аптада Испания клубтарының бірінің қосалқы командасымен ресми келісімшартқа қол қояды деп күтілуде. Аталған команда келесі маусымда елдің төртінші дивизионына жолдама алуды басты мақсат етіп отыр. Бұл – жас футболшы үшін еуропалық футболдағы маңызды қадамдардың бірі болмақ.
Айта кетейік, Нұрғалидан бөлек, қазіргі таңда Испанияның «Леванте» клубының дубль құрамында павлодарлық тағы бір талантты ойыншы — Шыңғыс Қалиев өнер көрсетіп жүр. Қос футболшы да Алматыдағы «Қайрат» академиясында тәлім алып, кәсіби жолын сол жерден бастаған. Бұл академияның қазақстандық футболға қаншалықты сапалы кадр дайындап жатқанын тағы бір мәрте дәлелдейді.
Шабуылдаушы жартылай қорғаушы позициясында ойнай алатын Алдияр Қазақстанның U19 құрамасымен бірге 2026 жылғы Еуропа чемпионатының элиталық іріктеу кезеңіне жолдама алды. Бұл кезеңде қазақстандық жасөспірімдер Украина, Румыния және Солтүстік Ирландия сынды мықты қарсыластармен күш сынасады. Алдиярдың халықаралық деңгейдегі бұл тәжірибесі оның кәсіби дамуына үлкен серпін беретіні сөзсіз.