«Қайраттың» Бақылау кеңесінің төрағасы Қайрат Боранбаев пен «Тараз» ФК директоры Дидар Сыдықбек 18 жастағы қақпашы Шерхан Қалмырзаның ықтимал ауысуына байланысты пікірталасқа түсті.
Мәліметке сәйкес, «Тараз» басшылығы жас голкипер Шерхан Қалмырзаны өз командасында көргісі келетінін ашық білдірген. Осы ниет Боранбаевтың қатаң реакциясын тудырды.
Қайрат Боранбаев әлеуметтік желіде «Тараз» тарапынан айтылған ұсынысқа қысқа да нұсқа жауап берді:
«Сіздің ұсынысыңыз тіпті талқыланбайды. Ештеңе жіберудің қажеті жоқ. Өзін-өзі жарнамалап, хайп қуу жеткілікті — өз клубыңыздың жұмысына көбірек көңіл бөліңіз», — деп жазды Боранбаев.
Ал «Тараз» директоры Дидар Сыдықбек бұл сөздерге сабырлы түрде жауап қатып, клубтың Қалмырзаға қатысты жоспары бар екенін меңзеді. Оның айтуынша, «Тараз» бапкерлер штабы сұраған ойыншылар бағытында жұмыс істейді және жалға алу нұсқасын тиімді шешім ретінде қарастырады:
«Қазақта үлкенді сыйлау, кішіні құрметтеу бар. Сондықтан Қайрат ағамызды қатты қадірлейміз… Айтылған кеңесті ескереміз, жұмысымызды жалғастырамыз. Уақыт бәрін көрсетеді. Бапкерлер штабы кім керек екенін айтады — соған қарай әрекет етеміз. Лимит бар екенін білесіздер. Шерханды жалға алу — жақсы нұсқа», — деді Сыдықбек.
Сондай-ақ ол клубтағы жағдай тұрақталса, болашақта елге танымал ойыншылардың қайта оралуы мүмкін екенін де атап өтті.