Оны түркиялық клуб шақырып жатыр.
Беларусь құрамасының жартылай қорғаушысы Валерий Громыко Түркияның "Газиантеп" клубына ауысуға жақын.
Legalbet дерегіне сүйенсек, 28 жастағы хавбек түрік командасының бас бапкері Бурак Йылмазбен жеке сөйлесіп үлгерген.
Ақпаратқа сәйкес, "Газиантеп" "Қайратпен" Громыконың трансфері бойынша келіссөзді алматылықтардың Чемпиондар лигасының жалпы кезеңіндегі "Брюггеге" қарсы матчынан кейін бастауды жоспарлап отыр. Ойын 20 қаңтарда өтеді.
Валерий Громыко 2024 жылдың жазынан бері "Қайрат" сапында ойнап келеді.
Ол 2025/26 маусымында барлық турнирде 41 матчқа қатысып, 6 гол соғып, 11 нәтижелі пас берген.
Transfermarkt порталы беларусь легионерінің нарықтық құнын 1,5 млн еуро деп бағалайды.
Громыко "Қайрат" құрамында Қазақстан чемпионы атағын екі рет жеңіп алды. Ел Суперкубогын иеленді.
Беларусь футболшысы бұған дейін БАТЭ, "Шахтёр" (Солигорск), "Минск", "Қайсар", "Арсенал" (Тула), "Торпедо" (Мәскеу) клубтарында өнер көрсетті.