АҚШ президенті кездесу барысында Лионель Мессиді Пеледен де мықты футболшы деп атады.
Лионель Месси бразилиялық аңыз Пеледен де мықты футболшы. АҚШ президенті Дональд Трамп Ақ үйде MLS чемпионы "Интер Майами" ойыншыларын қабылдау кезінде аргентиналық жұлдызға осындай мақтау сөздерін жаудырды.
Салтанатты кездесудің видеосы Ақ үйдің ресми YouTube арнасында жарияланды.
Қабылдау барысында Дональд Трамп футбол тақырыбына да тоқталып, Лионель Мессидің ойын деңгейін ерекше атап өтті. Президенттің айтуынша, аргентиналық шабуылшы әлемдік футбол тарихындағы ең мықты ойыншылардың бірі. Тіпті бразилиялық аңыз Пеледен де мықты.
Жалпы, бұл қабылдау Лионель Месси үшін де ерекше оқиға болды. Аргентиналық футболшы алғаш рет АҚШ президентінің ресми резиденциясына барды.
Айта кетейік, 2025 жылдың қаңтарында Мессиге АҚШ президентінің Бостандық медалін тапсыру рәсіміне шақырту жасалған, алайда ол сол кезде іс-шараға қатыса алмаған еді.
Өткен маусымда Лионель Месси "Интер Майами" сапында MLS Кубогын жеңіп алып, командасымен бірге Шығыс конференциясының чемпионы атанды.