Қазақстан құрамасының шабуылшысы Максим Самородов Ресей Премьер-Лигасында нәтижелі пас берді.
Ресей Премьер-Лигасының 22-туры аясында Грозныйдың "Ахматы" өз алаңында "Ростовты" қабылдады.
Кездесуде Қазақстан ұлттық құрамасының шабуылшысы Максим Самородов негізгі құрамда алаңға шықты. Ол 33-минутта бұрыштама добын орындап, соның нәтижесінде Эгаш Касинтура есеп ашты.
Екінші таймда қос команда да бірнеше мүмкіндік жасағанымен таблодағы есеп өзгеріссіз қалды.
Самородов 64-минутта алаңнан ауыстырылды.
Қазақстан құрамасының тағы бір өкілі Ғалымжан Кенжебек матчтың соңына қарай, нақтырақ айтқанда 90-минутта ойынға қосылды.
Ол аз уақыт өнер көрсеткенімен ойын нәтижесіне әсер ете алған жоқ.
Бұл жеңістен кейін "Ахмат" 30 ұпай жинап, турнир кестесінде 7-орынға көтерілді. Грозныйлықтар келесі ойынын 4 сәуір күні "Краснодарға" қарсы өткізеді.