"Шахтер" жауапсыз алты гол соқты
Футболдан Қазақстан Бірінші лигасының 3-турында түркістандық "Арыс" өз алаңында қарағандылық "Шахтерден" ойсырай жеңілді.
Матч тізгінін толық ұстады
Ойын бойы қарағандылық команда алаңдағы басымдықты қолында ұстап, шабуылда өте белсенді болды. Қарсылас қақпа маңында жиі қауіпті сәттер ұйымдастырған “Шахтер” қорғаныста да сенімді өнер көрсетті.
Матчтың басты кейіпкері Артем Литош болды. Шабуылшы хет-трик авторы атанып, командасының ірі жеңісіне зор үлес қосты. Бұдан бөлек, Максим Галкин 40-минутта мергендік танытса, Рифат Нұрмұғамет 65-минутта есеп айырмасын ұлғайтты. Ал кездесудегі соңғы нүктені Арман Нүсіп 81-минутта қойды.
Бірінші лигадағы жағдай
Осы жеңістен кейін қарағандылық ұжым турнир кестесінде 1-орынға көтерілді. Команданың еншісінде 7 ұпай бар. Доп айырмасы да әсерлі — 10:0.
Мұндай нәтиже “Шахтердің” маусымды өте сенімді бастап, Бірінші лигада басты фавориттердің бірі екенін аңғартты.
Келесі турда қарағандылық клуб өз алаңында “Тобылдың” жастар командасымен кездеседі. Ойын 1 мамыр күні сағат 15:00-де басталады.