"Аудан орталығына арналған стадион": депутат Астанадағы 17 миллиардтық спорт кешенін сынға алды
Мәжіліс депутаты Данияр Қасқарауов Қажымұқан Мұңайтпасов атындағы жаңа спорт кешеніне қатысты өткір пікір білдірді.
Депутат жаңа стадионға қатысты мәселе көтерді
Астанада Қажымұқан Мұңайтпасов атындағы стадионның құрылысы аяқталып, нысанның ресми ашылу рәсімі өтті. Бірақ Мәжіліс депутаты Данияр Қасқарауов бұл спорт кешенінің көлемі мен оған жұмсалған қаражатқа қатысты күмәнін жасырмады.
Парламент депутатының айтуынша, елорда тұрғындарына бұған дейін халықаралық талаптарға сай заманауи спорт кешені салынады деген үміт берілген. Бірақ дайын нысан көпшіліктің күткен деңгейінен шықпаған.
Данияр Қасқарауов әлеуметтік желідегі жазбасында жаңа стадион небәрі 3600 орынға есептелгенін, ал оның құрылысына 17,3 миллиард теңге жұмсалғанын атап өтті.
“Астанада Қажымұқан Мұңайтпасов атындағы стадионның құрылысы аяқталды. Салтанатты түрде лента қиылды, әдемі есеп берілді. Бірақ 3600 орындық стадионды 17,3 миллиард теңгеге салу қаншалықты орынды? Бұл жоба былтыр таныстырылған кезде елорда тұрғындары үлкен үміт күткен еді. Ескі стадион сүріліп, орнына халықаралық стандарттарға сай жаңа спорт кешені салынады делінген. Алайда нәтижесіне, көлеміне қарасақ, бұл тек аудан орталығына арналған стадион деуге келетіндей”, — деп жазды депутат.
Қасқарауов нақты есеп талап етті
Мәжілісмен бұл мәселе жауапты тұлғалар толық әрі ашық есеп бермейінше жабылмайтынын айтты. Оның сөзінше, қоғамға әдемі презентация емес, нақты жауап қажет.
“Жауапты адамдар жұмсалған қаражат бойынша нақты есеп бермейінше, бұл тақырып жабылмайды. Жобаға қатысы барлар жұрт үндемей қалады деп ойламауы керек. Бізге ақталу емес, анық есеп керек. Әдемі таныстырылым емес, ашық жауап қажет. Бұл — қоғамның мәселесі. Халық өз қаржысының есебін сұрап отыр. Стадионды салғандар мен ақша жұмсағандар осы сұраққа ашық жауап беруі тиіс”, — деді Данияр Қасқарауов.