"Бұл Федерацияға қарсы ақпараттық шабуыл": Ермұхамед Мәулен Байсуфинов төңірегіндегі дауға пікір білдірді
Спорт журналисі әрі блогер Ермұхамед Мәулен ұлттық құраманың бұрынғы бас бапкері Талғат Байсуфиновтың жалақысына қатысты тараған ақпаратқа пікір білдірді. Оның айтуынша, қазіргі жағдай Қазақстан футбол федерациясын қаралау әрекетіне ұқсайды.
Мәулен: Федерацияны әдейі қаралағысы келетіндер бар
Қазақстан футболындағы кезекті дау қоғам назарын өзіне аударды. Бұған дейін БАҚ беттерінде Қазақстан құрамасының экс-бапкері Талғат Байсуфиновтың ай сайынғы еңбекақысы туралы мәлімет жарияланған еді.
Осы жағдайға қатысты спорт журналисі және блогер Ермұхамед Маулен өз ойын білдірді. Ол бұл ақпараттың кездейсоқ тарамағанын айтып, мұны алдын ала жоспарланған қадам деп бағалады.
“Талғат Байсуфиновтың жалақысы туралы ақпараттың жариялануы – әдейі жасалған, жоспарлы әрекет. Неге ешкім оның құраманы қиын кезеңде сақтап қалғанын айтпайды? Команданың ішкі ахуалы ауыр болған тұста ол ұжымның рухын көтеруге тырысты. Байсуфинов Қазақстан футболының дамымай тұрғанын өз көзімен көрді”, – деді Мәулен.
Мақсат – ҚФФ беделіне нұқсан келтіру
Ермұхамед Мәуленнің пікірінше, бұл оқиға тек бір маманның жалақысына қатысты мәселе емес. Ол мұның артында Қазақстан футбол федерациясының қазіргі басшылығына қарсы бағытталған ақпараттық науқан болуы мүмкін екенін айтты.
“Қазір біз федерацияны қаралауға бағытталған нақты әрекетті көріп отырмыз. Бұл – мақсатты ақпараттық шабуыл. Оның артында кім тұруы мүмкін? Мүмкін ҚФФ президенті Марат Омаровты қызметінен кетіргісі келетіндер шығар. Мұндай үміткерлер көп емес, екі-үш адам ғана. Бәлкім олардың арасында жақында ғана федерация құрылымында жұмыс істеп, кейін кеткен адамдар бар шығар. Бірақ мен нақты ешкімді меңзеп тұрғаным жоқ”, – деді блогер.
Байсуфиновтың жалақысы қанша болған?
Бұған дейін бұқаралық ақпарат құралдарында Талғат Байсуфиновтың Қазақстан құрамасындағы негізгі айлығы шамамен 12 миллион теңге болғаны хабарланған. Бұл жылына салыққа дейін шамамен 144 миллион теңге деген сөз.
Аталған ақпарат жарияланғаннан кейін әлеуметтік желіде және футбол қауымдастығында қызу талқылау басталды. Бір тарап мұндай жалақыны негізсіз жоғары деп санаса, екінші тарап бапкердің ұлттық құрамадағы ауыр кезеңде атқарған жұмысын ескеру қажет екенін айтуда.