Дастан Сәтпаев әйгілі карикатуршының ролигінде Артета мен Маресканы таңғалдырды (ВИДЕО)
Белгілі футбол карикатуршы Хамид Сахари Қазақстан құрамасының шабуылшысы Дастан Сәтпаев пен лондондық "Челсидің" трансферлік саясатына арналған жаңа анимациялық бейнеролик жариялады.
“Челсидің” ардагер футболшыларға деген қызығушылығы әзілге айналды
Роликтің басында “Челсидің” тәжірибелі ойыншылар Джордан Хендерсон мен Дэнни Уэлбекті қатарына қосуы мүмкін деген ақпарат мысқылмен бейнеленген. Хендерсон 36 жаста болса, Уэлбек 35-ке келген. Екі футболшының жалпы жасы 71-ге жеткендіктен лондондық клубтың ықтимал трансферлері әлеуметтік желілерде көптеген әзілге себеп болды.
Карикатурада қос ардагерді Англия Премьер-лигасындағы бәсекелес командалардың бас бапкерлері бақылап, “Челсидің” трансферлік стратегиясына күле қарайды.
Артета мен өзге бапкерлер Сәтпаевты көріп таңғалды
Бейнероликте Микель Артета, Энцо Мареска, Андони Ираола және Майкл Кэррик “Челсидің” жаңа ойыншылары өз командаларына қауіп төндірмейді деп есептейді. Бірақ артынша Хаби Алонсоның басты тосынсыйы ретінде 17 жастағы Дастан Сәтпаев пайда болады.
Қазақстандық шабуылшы роликте жас, жылдам әрі физикалық тұрғыдан мықты футболшы ретінде бейнеленген. Ол алдымен жоғары жылдамдығын көрсетіп, кейін “Челсидің” бас бапкерімен бірге ауыр зілтемірді көтереді. Осы көріністен кейін қарсылас командалардың жаттықтырушылары күлкісін тоқтатып, Сәтпаевқа таңданыспен қарайды.
Автор Сәтпаевтың әлеуетін ерекше көрсетті
Хамид Сахари өз жұмысында Хендерсон мен Уэлбектің тәжірибесі мен жасын Дастан Сәтпаевтың жастығына, жылдамдығына және зор әлеуетіне қарсы қойған.
“Хаби Алонсо мен “Челсидің” тосынсыйы – Қазақстаннан келген 17 жастағы шабуылшы”, – деп жазды карикатуршы бейнеролик сипаттамасында.
Жарияланым ағылшын және парсы тілдерінде ұсынылған.
Сәтпаев “Челси” сапында алғашқы матчта гол соқты
Карикатураның жарық көруіне Дастан Сәтпаевтың “Челси” сапында алғашқы маусым алдындағы кездесуде сәтті өнер көрсетуі себеп болды. Шабуылшы Австралияның “Вестерн Сидней Уондерерс” клубына қарсы ойында негізгі құрамнан орын алды. Ол кездесудің жетінші минутында гол соғып, Хаби Алонсо дәуіріндегі “Челсидің” алғашқы добын тіркеді.
Нәтижелі өткен матчта лондондық команда қарсыласын 6:4 есебімен жеңді.
Қазір Сәтпаев “Челси” сапында қаралымдағы футболшы мәртебесінде өнер көрсетіп жүр. Оның алматылық “Қайраттан” лондондық клубқа трансфері 12 тамызда, футболшы 18 жасқа толғаннан кейін ресми түрде күшіне енеді.