Британиялық басылым Дастан Сәтпаевты "Челсидің" негізгі құрамына қосты

Жалға кеткендерден жеке команда жасақталды

Мақалада лондондық клубтың трансферлік саясаты мен футболшыларды өзге командаларға жалға беру жүйесі талданған. Басылымның мәліметінше, қазір "Челсиге" тиесілі 19 ойыншы түрлі клубтарда уақытша өнер көрсетіп жүр.

Авторлар бұл футболшылардан Чемпионшип деңгейінде бәсекеге қабілетті негізгі құрам мен қосалқы ойыншылар тізімін жасауға болатынын атап өтті.

"Қазір "Челсидің" жалға берілген ойыншылары соншалықты көп, олардан кем дегенде Чемпионшипте бәсекелесе алатын мықты команда құруға болады", — деп жазды британиялық портал.

Сәтпаев негізгі құрамнан орын алды

Қазір "Бернли" сапында ойнап жүрген Қазақстан құрамасының 18 жастағы вингері Дастан Сәтпаев The Sun жасаған символикалық команданың негізгі құрамына енгізілді.

Басылым қазақстандық ойыншыны жоғары бағалап, оған алғашқы минуттан алаңға шығатын футболшылардың қатарынан орын берген. Ал Аргентина құрамасының танымал ойыншысы Алехандро Гарначо мен қақпашы Филип Йоргенсен секілді футболшылар қосалқы құрамда қалған.

Сәтпаевтың Англиядағы алғашқы қадамдары

Қазақстандық шабуылшы маусым айының ортасында алматылық "Қайраттан" "Челсиге" ауысты. Ол лондондық клубтың сапында бірнеше жолдастық матч өткізіп, алғашқы голын да соғып үлгерді.

Кейін "Челси" басшылығы мен бапкерлер штабы жас футболшыны тәжірибе жинауы үшін Чемпионшипте өнер көрсететін "Бернлиге" жалға беру туралы шешім қабылдады.

Сәтпаев жаңа командасына тез бейімделіп, бас бапкердің сеніміне ие болды. Ол "Бернлидің" кейінгі үш кездесуінде негізгі құрамнан орын алды. Ресми кездесулерде әзірге гол соғып немесе нәтижелі пас беріп үлгермегенімен, оның алаңдағы белсенді ойыны жанкүйерлердің көңілінен шықты.

Чемпионшип "Мидлсброға" қарсы өткен соңғы матчта қазақстандық футболшыны кездесудің үздік ойыншысы деп таныды. "Бернли" жанкүйерлері де әлеуметтік желілерде Сәтпаевтың техникасы, еңбекқорлығы мен шабуылдағы қозғалысына жоғары баға берді.