Олжас Байбосын: Қазақ футболының деңгейі нөл

Танымал спорт комментаторы Олжас Байбосын Қазақстан құрамасының ойынын қатаң сынға алды. Оның пікірінше, Ұлттық құрама Австрияға қарсы өте сүреңсіз ойын көрсеткен. Бұдан бөлек, белгілі комментатор Ұлттар лигасы аясында үш матч өткізіп, бірде-бір гол соға алмаған футболшыларды Ұлттық құрама жейдесін киуге лайық емес екенін қадап айтты. 

«Қазақ футболының деңгейі қандай? Қазақ футболының деңгейі нөл. Нөл деп қорықпай айтар едім. Жоқ, тіпті біздің деңгейіміз тіпті минусқа кетіп қалған. Біз құрдымдамыз дәл қазір. Неге көзге көрініп тұрған проблеманы айтпаймыз? Кімнен қорқамыз немесе кімнен ұяламыз? Жігіттер, ренжімеңдер сендер ұлттық құрама жейдесін киуге лайық емессіңдер. Қазақтың бір ауруы біздің ұлттың кеселі  дер кезінде қоя алмаймыз. Шалдарымыз пенсияға шықса да орнын босатпай жұмыс істей береді. Футболшыларымыз жүгіре алмай қалса да, футбол ойнай береді. Қазіргі құрамадағы бірнеше футболшы, атын атап түсін түстемей-ақ қояйын, қойсаңдаршы. Ей айналып кетейін, осы абыроймен тоқтатсай. Не позортесь. Тоқтасаңдаршы. Өтініш! Деңгейлерің ұлттық құрама емес, Премьер-лига да емес, 1 лига деп айтар едім. Егер ол жақта негізгі қүрамда орын бұйырса, әрине», - деді Олжас Байбосын. 

Естеріңізге сала кетейік, футболдан Қазақстан құрамасы Ұлттар лигасының топтық кезеңінде Аустриядан ойсырай жеңілді. Оның алдында да біздің команда Словениядан ірі есеппен ұтылған еді.