ҚФФ президенті: Черчесовтың кезінде құрамада прогресс байқалады
Ресейлік басылымға сұхбат берген Әділет Барменқұлов Станислав Черчесовтың жетекшілігі кезіндегі Қазақстан құрамасының ойынына баға берді.
Қазақстан футбол федерациясының басшысы Әділет Барменқұлов Станислав Черчесов жаттықтыратын Қазақстан құрамасының ойынына баға берді.
"Мен нәтижені көрдім. Өзімізге қажетті нәрсеге қол жеткізіп жатырмыз. Бірақ әлі толық емес. Себебі жеңіс жоқ. Дей тұрғанмен, ойын құрылымы жағынан өзгеріс бар. Ойын стилі, философиясы нақтыланды. Эксперименттер жүргізіліп жатыр. Көрсеткіштер жаман емес. Қазір бізге нәтижеге қарағанда команданы қайта құру маңыздырақ. Футболшыларды, олардың мүмкіндіктерін қарап жатырмыз. Көрсеткіштер бойынша ойыншылардың физикалық дайындығы жақсы. Енді бекітілген жүйені іске асыруымыз керек. Құрамаға Черчесов келгелі командада ілгерілеу барын көріп отырмын", - деді Бәрменқұлов "championat.com " сайтына берген сұхбатында.
Айта кетейік, Станислав Черчесов Қазақстан құрамасының бас бапкері болып тағайындалғалы Ұлттық құрама төрт кездесу өткізді. Оның үшеуінде қазақстандық команда жеңілсе, біреуінде тең ойнады.