Ресми: Әділет Бәрменқұлов ҚФФ президенті қызметінен кетті
Бұл туралы Қазақстан футбол федерациясының Instagram-дағы ресми парақшасында хабарланды.
Қазақстан футбол федерациясы Әділет Барменқұловтың президент қызметінен кеткенін растады. Бұған дейін ҚФФ басшысы өз еркімен орнын босататыны туралы ақпар тараған еді.
Федерация Әділет Бәрменқұловтың ел футболының дамуына қосқан үлесі үшін алғыс білдірді.
"Әділет Назарбайұлы 2022 жылы ақпанда ҚФФ президенті болып сайланды. Осы сәттен бастап ел футболының дамуының жаңа кезеңі басталды. Оның бастамасымен бұқаралық футбол, әйелдер футболы және инфрақұрылымды дамытуға арналған жобалар сәтті іске асты. Екі жыл ішінде мыңдаған бала мен жастарға футболмен сапалы алаңдарда жаттығуға мүмкіндік берген «ALAN» жобасы аясында еліміздің әр түкпірінде 13 жаңа толыққанды алаң ашылды."
Айта кетейік, ҚФФ Жарғысына сәйкес, жаңа президент ҚФФ кезектен тыс конференциясында сайланады. Өтетін уақыты жақын арада белгілі болады.