Зайнутдинов: Түркиядағы футбол деңгейі Ресейдегіден жоғары

Қазақстан құрамасының әрі түркиялық «Бешикташтың» жартылай қорғаушысы Бахтиёр Зайнутдинов Түркия мен Ресей чемпионаттары арасындағы айырмашылық жайлы пікірін білдірді.

«Қай чемпионат күшті? Әр чемпионат өзінше мықты. Түркияда ойын ашықтау өтеді, мұнда шабуылға көбірек көңіл бөлінеді. Себебі жанкүйерлер өте талапшыл, алаңда шоу көргісі келеді. Көптеген командалар төрт қорғаушымен ойнайды. Футболшылардың деңгейі Түркияда сәл жоғарырақ деп ойлаймын. Әсіресе «Галатасарай», «Фенербахче», «Бешикташ» секілді алдыңғы қатарлы командаларда. Бұл клубтар әйгілі футболшыларды, жұлдыздарды сатып алады», – деді Зайнутдинов «Известия» басылымына берген сұхбатында.

Ағымдағы маусымда Зайнутдинов Түркия Суперлигасында екі ойынға қатысты.  Бірақ нәтижелі әрекеттерімен көзге түспеді. 

Айта кетейік, Қазақстан құрамасы ойыншысының «Бешикташпен» келісімшарты 2027 жылдың жазына дейін жасалған. Transfermarkt мәліметтері бойынша, қазір футболшының нарықтық құны 4 млн еуро.