"Барыс" Дінмұхамед Қайыржанмен келісімшартты ұзартты
Хоккейден Қазақстан құрамасының шабуылшысы Дінмұхамед Қайыржан астаналық клубпен жаңа келісімге қол қойды.
Жаңа келісімнің шарттары қандай?
Клуб таратқан мәліметке сәйкес, 22 жастағы шабуылшымен жасалған біржақты келісімшарт екі маусымға есептелген. Яғни Қайыржан “Барыс” сапында 2028 жылдың 31 мамырына дейін өнер көрсетеді.
2025/26 маусымы Дінмұхамед Қайыржан үшін ҚХЛ аясындағы ең нәтижелі кезеңдердің бірі болды. Ол:
- 67 матчқа қатысып,
- 22 ұпай (8 гол + 14 пас) жинады,
- “Барыс” құрамындағы қазақстандық хоккейшілер арасында ең нәтижелі ойыншы атанды.
Сонымен қатар шабуылшы:
- 46 рет қарсыластың соққысын бұғаттады,
- бір матчта орта есеппен 15,5 минут мұз айдынында болды,
- 60 күштік әдіс қолданды.
Бұл көрсеткіштер оның командадағы маңызын айқын көрсетеді.
“Барыс” жүйесінің түлегі
Дінмұхамед Қайыржан – “Барыс” клубының өз тәрбиеленушісі. Ол кәсіби мансабын 2020 жылы “Снежные Барсы” командасында бастаған.
2021 жылдан бастап негізгі құрамға қосылып, ҚХЛ-де тұрақты өнер көрсетіп келеді. Сонымен қатар “Барыстың” фарм-клубы – “Номад” сапында да тәжірибе жинақтаған.
Қайыржан 2023 жылы қазақстандық хоккей тарихында ерекше жетістікке жетті. Ол әлем чемпионатының элиталық дивизионында Қазақстан құрамасы сапында ойнаған ең жас хоккейші ретінде тіркелді.