Хоккейден Қазақстан құрамасы әлем чемпионатын сенімді жеңіспен бастады
Ұлттық құрама хоккейден 2026 жылғы әлем чемпионатының Бірінші дивизионындағы алғашқы ойынын жеңіспен аяқтады.
Қазақстан алғашқы минутта гол жіберіп алды
Талғат Жайлауовтвң шәкірттері Литва құрамасын 4:1 есебімен ұтты.
Матч Қазақстан үшін оңай басталған жоқ. Литвалықтар 2-минутта алға шықты. Осыдан кейін қазақстандық команда ұзақ уақыт бойы қарсылас қақпасына жол таба алмады.
Тек үшінші кезеңнің басында, 42-минутта Кирилл Савицкий есепті теңестірді. Бұл гол Қазақстан құрамасына психологиялық тұрғыдан серпін берді.
Гатиятов жеңіс шайбасын соқты
47-минутта Артур Гатиятов Қазақстанды алға шығарды. Ал ойынның соңғы бөлігінде Талғат Жайлауовтың командасы басымдығын толық бекітті.
56-минутта Семен Симонов мергендігімен көзге түссе, 59-минутта Федор Хорошев қорытынды есепті орнатты.
Келесі қарсылас — Жапония
Қазақстан құрамасы турнирдегі екінші кездесуін ертең өткізеді. Қарсылас — Жапония құрамасы. Матч 15:30-да басталады.
Айта кетейік, әлем чемпионатының элиталық дивизионына жолдама алу үшін Қазақстан құрамасы Бірінші дивизионда бірінші немесе екінші орын иеленуі керек.