"Барыс" канадалық шабуылшымен келісімшарт жасады
Астаналық "Барыс" жаңа маусым алдындағы құрамын күшейтуді жалғастырып жатыр.
Жаңа легионер қосылды
ҚХЛ-де өнер көрсететін “Барыс” канадалық форвард Гарретт Пилонды ресми түрде таныстырды. Клубтың баспасөз қызметінің мәліметінше, ойыншымен жасалған біржақты келісімшарт 2027 жылдың 31 мамырына дейін есептелген.
Пилон осы уақытқа дейін мансабын Солтүстік Америка лигаларында өткізген. Енді алғаш рет Еуразия құрлығында өнер көрсетіп, “Барыстың” шабуыл шебін күшейтпек.
Гарретт Пилон кім?
Гарретт Пилон - 1998 жылы 13 сәуірде дүниеге келген канадалық шабуылшы. Оның бойы – 182 сантиметр, салмағы – 87 келі. Хоккейші оң қолмен ойнайды.
Канадалық форвард соңғы жылдары АХЛ-де тәжірибе жинаған. 2023 жылы “Херши Беарс” сапында Калдер Кубогын жеңіп алды. Бұл – АХЛ-дегі ең беделді командалық трофейлердің бірі.
Соңғы үш маусымда “Оттава Сенаторз” клубының фарм-командасы саналатын “Беллвилл Сенаторз” сапында ойнады. Оның екі маусымда команда капитаны болғаны да атап өтілді.
Пилон өткен тұрақты АХЛ чемпионатында 56 матчқа қатысып, 31 ұпай жинады. Оның еншісінде 8 гол және 21 нәтижелі пас бар.
Жалпы АХЛ-дегі мансабында 485 ойын өткізіп, 105 гол соқты және 199 нәтижелі пас берді.
Жаңа маусым қашан басталады?
Михаил Кравец баптайтын “Барыс” жаңа ҚХЛ маусымындағы алғашқы кездесуін 7 қыркүйекте өткізеді. Елордалық команда өз айдынында новосібірлік “Сібірді” қабылдайды.
Одан кейін Астанада тағы екі ойын өткізеді: 9 қыркүйекте уфалық “Салават Юлаевпен”, ал 12 қыркүйекте хабаровскілік “Амурмен” кездеседі.