Астана Еуропа чемпионатының финалдық кезеңін қабылдайды
Албания астанасы Тиранадағы УЕФА Атқарушы комитетінің отырысында бірқатар халықаралық жарыстардың қожайындары анықталды. Соның ішінде Қазақстан футбол федерациясы (ҚФФ) мен Қазақстан футзал қауымдастығының өтініші қолдау тауып, 2027 жылы 19 жасқа дейінгі ойыншылар арасындағы Еуропа чемпионатының финалдық кезеңі Астанада өтетіні белгілі болды.
Қазақстан құрамасы автоматты түрде қатысады
Жарысты қабылдаушы ел ретінде Қазақстан жастар құрамасы турнирге автоматты түрде қатысу құқығына ие болады. Осылайша біздің футзалшылар Еуропаның үздік сегіз командасының қатарында бақ сынайды.
Турнир тарихы мен мықты командалар
Жастар арасындағы Еуропа чемпионаты алғаш рет 2019 жылы ұйымдастырылған. Қазіргі таңда U-19 Еуропа чемпионы — Португалия құрамасы. Ал ең табысты команда ретінде екі мәрте (2019, 2022) жеңімпаз атанған Испания құрамасы есептеледі.