Қазақстандық шахматшы әлем чемпионатында топ жарды
19 жастағы қазақстандық Ксения Балабаева Перудің Лима қаласында өтіп жатқан 20 жасқа дейінгі жастар арасындағы рапид бойынша әлем чемпионатында жеңіске жетті.
Турнир 23–25 қыркүйек аралығында 9 турдан тұратын швейцарлық жүйе бойынша 15+10 уақыт бақылауымен өтті.
Балабаева жарысты 7 ұпаймен аяқтап, соңғы күні Умида Омоновадан басым түсіп, Анна Журова мен Афруза Хамдамовамен тең ойнады. Бұл нәтижелер оған мерзімінен бұрын бірінші орынды қамтамасыз етуге мүмкіндік берді.
Үздік үштікке сондай-ақ Хамдамова (Өзбекстан, 6,5 ұпай) және Варвара Полякова (FIDE, 6,5) енді. Қазақстандық қатысушылардың ішінде Амина Қайырбекова 7-орынға (6 ұпай), Лия Құрманғалиева 12-орынға (5 ұпай) ие болды.
Жігіттер арасында 16 жастағы өзбек шахматшысы Мұхаммадзохид Суяров 7,5 ұпаймен чемпион атанды.
Блиц бойынша жарыстар 27–28 қыркүйекте өтеді.