Эр-Риядта өтіп жатқан VI Ислам ынтымақтастығы ойындарында Қазақстан құрамасына кезекті алтын медаль бұйырды.
Қазақстанның шпагашылар құрамасы — Вадим Шарлаимов, Ерлік Сертай және Кирилл Проходов жарыс барысында екі бірдей маңызды жеңіске жетіп, Исламиада-2025 финалына шықты.
Алғашқы кезеңде қазақстандық спортшылар Қырғызстан құрамасын 45:34 есебімен жеңді. Жартылай финалда қарсыластарын еш қиындықсыз тоқтатты — Оман құрамасы 45:26 есебімен ұтылды. Шешуші кездесуде Қазақстан құрамасы Исламиада қожайындары — Сауд Арабиясымен күш сынасты. Финалдық белдесу тартысты өрбігенімен қазақстандық шпагашылар матчты толық бақылауда ұстап, 45:28 есебімен айқын жеңіске жетті.
Бұл жеңіс Қазақстан үшін Исламиада-2025 сайысындағы 14-ші алтын медаль болып тіркелді.