Олимпиадада қазақстандықтар төрелік ететін болды

Халықаралық Олимпиада комитеті (ХОК) 2026 жылғы XXV қысқы Олимпиада ойындарында әр спорт түрі бойынша төрелік ететін ресми тұлғалардың тізімін жариялады.

Ресми құжаттарға сәйкес, 16 спорт түрінің екеуінде төрешілер құрамына Қазақстан өкілдері енген.

• Мәнерлеп сырғанау - Надежда Парецкая қызмет атқарады
• Фристайл-могул - Юлия Дегтева.

Тәжірибе мен біліктілік

Ашық дереккөздердегі мәліметке сүйенсек, Надежда Парецкая — мәнерлеп сырғанау бойынша жаттықтырушы. Оның аталған спорт түрінен ISU Judge деңгейіндегі халықаралық төрешілік лицензиясы бар.

Ал Юлия Дегтева бұрын фристайл-могулдан Қазақстан ұлттық құрамасының спортшысы болған. Ол:

• 2006 және 2010 жылғы Олимпиада ойындарына қатысқан,
• 2011 жылғы қысқы Азия ойындарының күміс жүлдегері,
• қазіргі таңда FIS "A" санатындағы жоғары деңгейлі төреші мәртебесіне ие.

Олимпиаданы тікелей эфирде көрсету

Айта кетейік, XXV қысқы Олимпиада ойындары 6–22 ақпан аралығында Италияда өтеді. Қазақстандық телеарналар Олимпиада жарыстарын тікелей эфирде көрсетеді.