50 млн теңге, екі көлік және пәтер: Оралда бәйге жарысы өтеді
"Жайық жүйрігі–2026" деп аталатын турнир қала күніне орай 13 қыркүйекке жоспарланған. Қазір жарысқа өтінім қабылдау жүріп жатыр.
13 қыркүйекте Орал қаласында жүлде қоры 50 миллион теңгені құрайтын "Жайық жүйрігі–2026" ұлттық ат спорты турнирі өтеді.
Жарыс аясында үш негізгі бәйге ұйымдастырылып, жеңімпаздарға автокөлік, бір бөлмелі пәтер және ақшалай сыйлықтар табысталады.
Үш бірдей бәйге өтеді
Турнир бағдарламасына ұлттық ат спортының үш классикалық жарысы енгізілген:
- Құнан бәйге;
- Топ бәйге;
- Аламан бәйге.
Әр санатта бірінші орын алған шабандоздар мен ат иелеріне ірі жүлделер қарастырылған. Жалпы есепте екі автокөлік пен бір бөлмелі пәтер сарапқа салынады.
Сонымен қатар, бәйгеде жүлделі орындарға ақшалай төлем де қарастырылған. Ең ірі ақшалай сыйлықтардың бірі Аламан бәйгеде екінші орын алған қатысушыға беріледі – 3 миллион теңге.
Басқа санаттардағы жүлделер орынға қарай кезең-кезеңімен азаяды. Ең төменгі көрсетілген сыйақы Құнан бәйгеде бесінші орынға берілетін 400 мың теңге.
Осылайша, турнирдің жалпы жүлде қоры 50 миллион теңгеге жетеді.
Айта кетейік, "Жайық жүйрігі–2026" турнирі 13 қыркүйекте Оралда өтеді.