Юрген Клопп ел алдындағы еңбегі үшін орденмен марапатталды
Неміс бапкеріне мемлекеттік марапатты Германия президенті Франк-Вальтер Штайнмайер табыстады.
«Ливерпуль» және дортмундтық «Боруссияның» бұрынғы бас бапкері Юрген Клопп Германия Федеративтік Республикасының «Ел алдындағы еңбегі үшін» федералдық орденімен марапатталды.
Bild басылымының хабарлауынша, бұл марапат Германияның бірлігі күніне орайластырылған.
Орденмен бірге табысталған жазбада: «Табыс пен даңқ әр спортшының бойындағы адамгершілікті көруге оған ешқашан кедергі болған емес», — деп жазылған.
Еске сала кетейік, Клопп 2008-2015 жылдар аралығында «Боруссияны» жаттықтырды. Осы уақытта Клопптың командасы екі рет Германия чемпионы атанды. 2015 жылдан 2024 жылға дейін Клопп «Ливерпуль» клубының бас бапкері болып, Чемпиондар лигасын, Англия чемпионатын жеңіп алды.