Бибісара Асаубаева сырқаттанса да, сыр білдірмей әлемдік гран-приде «қола» еншіледі
Жуырда Шымкентте әйелдер арасында шахматтан әлемдік гран-при турнирінің екінші кезеңі аяқталды.
Шымкентте әйелдер арасында шахматтан әлемдік гран-при турнирінің екінші кезеңі аяқталды. Зияткерлік сайыста Ресейлік Александра Горячкина жеңіске жетті. Екінші орын қытайлық Тань Чжуньи-ге бұйырды. Ал отандасымыз Бибісара Асаубаева сырқатына қарамастан үздік үштікті түйіндеп, қола медаль еншіледі.
«Турнирді екіге бөліп айтайын. Себебі 5-ші кезеңге дейін жақсы ойнап, өзіме көңілім толды. Ал кейін ауырып қалдым. Бірақ сырқатыма қарамастан қарсыластарыммен ойынға шықтым. Бұл жолы Катерина Логно және Александра Горячкинамен жарысым тартысты болды. Енді жыл соңында Нью-Йоркте өтетін әлем чемпионатына баруды жоспарлап отырмын», - деді Шахматтан әлемнің екі дүркін чемпионы Бибісара Асаубаева.
Турнирдің жалпы жүлде қоры – 600 мың доллар. Оның 120 мың доллары – жалпы есепте үздік болған он ойыншыға үлестіріледі. Ал ең көп ұпай жинаған қатысушы 2026-шы жылы өтетін «шахмат тәжі» жарысының жолдамасына ие болады.