Бибісара Асаубаева рекордтық нәтижесі туралы айтты
Қазақстандық шахматшы, блиц бойынша бұрынғы әлем чемпионы Бибісара Асаубаева қысқа уақыт ішінде өткізген рекордтық партиялар саны туралы айтып берді.
17 классикалық партия — жарты айда
Асаубаева Instagram парақшасында жанкүйерлердің сұрақтарына жауап беріп, жарыстардан кейін демалып жатқаны жайлы ойын айтып берді.
"Жарты ай ішінде 17 классикалық партия ойнадым. Сондықтан қазір демалып жатырмын деуге болады. Бірақ сәуірде қайтадан турнирлерге қатысамын", — деп жазды ол.
Әлем чемпионы атағы үшін күрес – үміт бар
Жанкүйерлердің бірі Бибісарадан классикалық шахматтан әлем чемпионы атағына таласатын Гран-при турниріне қатысты сұрады. Шахматшы бұл турнирдің ережесіне сәйкес, әр қатысушы 6 кезеңнің үшеуіне ғана қатыса алатынын және өзі үш кезеңін толық ойнап шыққанын айтты. Қазір ол қарсыластарының нәтижелерін күтіп отыр.
"Қалған қатысушылардың ұпайларын күтемін. Соған байланысты әлем чемпиондығы үшін күресуге мүмкіндік аламын ба, жоқ па — белгілі болады", — деп түсіндірді Асаубаева.