Дубайда өтіп жатқан IBA нұсқасындағы бокстан әлем чемпионатында Қазақстан құрамасының өнеріне белгілі комик әрі актер Нұрлан Сабуров пікір білдіріп, командаға шешуші сәтте сәттілік тіледі.
Өнер иесі турнирді жіті бақылап жүргенін айтып, ұлттық құрамаға үлкен жеңістер мен жаңа белестерді бағындыруды тіледі.
«Қазақстан құрамасына ірі жеңістер, жарқын жетістіктер және жаңа шыңдарға нық қадам тілеймін. Алға, Қазақстан! Спортшыларымыздың рухына, таланты мен еңбексүйгіштігіне сенемін. Әрбір жекпе-жек елге қуаныш сыйлап, әрбір жеңіс келер ұрпаққа шабыт берсін», — деді Нұрлан Сабуров.
Сабуровтың құттықтауы турнирдің ең маңызды күні қарсаңында жарияланды. 13 желтоқсанда Қазақстанның төрт боксшысы әлем чемпионатының финалдық кездесулеріне шығып, алтын медаль үшін жұдырықтасады.
Дубайдағы додада қазақстандық былғары қолғап шеберлері финалға дейін жетіп, ел үмітін үкіледі. Енді шешуші жекпе-жектерде құраманың басты міндеті — жеңісті жолды алтынмен аяқтау.