Марадонаның жыртылған жейдесі 179 мың долларға сатылды
Футбол тарихындағы ең даулы әрі есте қаларлық финалдардың бірінен қалған жәдігер – аргентиналық аңыз Диего Марадонаның жыртылған «Барселона» жейдесі Matchday Football Auctions аукционында 179 мың АҚШ долларына өтті.
Бұл жейде қай матчтан қалған?
Аталған ойын формасы Марадонаға 1984 жылғы Испания кубогының финалында тиесілі болған. Ол кезде «Барселона» Бильбаоның «Атлетигімен» кездесіп, 0:1 есебімен жеңілген. Матчтан кейін алаңда жаппай қақтығыс басталып, футболшының жейдесі жағасы жыртылған.
Лот сипаттамасына сай жейде алғашында клубтың киім-кешегін жинап, жууға дайындайтын қызметкердің қолына түскен. Ол форманы тігіп үлгермей, естелік ретінде сақтап қалған. Кейінірек жейде «Барселона» қызметкерлері жиі бас сұғатын орындардың біріндегі бар иесіне өтіп, ақыры оның ұлы аукционға шығаруға шешім қабылдаған.
Баға қалай қалыптасты?
Кей деректерде лоттың бастапқы «балға бағасы» бөлек есептеліп, сатып алушы комиссиясымен бірге жалпы құны 179 мың долларға жеткені айтылады.