Қазақстан боксындағы аңыз тұлға, World Boxing ұйымының президенті әрі ҚР ҰОК басшысы Геннадий Головкин Португалия футболының жұлдызы Криштиану Роналдумен кездесіп, алдағы жоспары жайлы қысқаша пікір айтты.
Кездесу Сауд Арабиясының Эр-Рияд қаласында болған. Бұған дейін Головкин осы қалада өткен бокс кешіне қатысқан. Сол кештің басты жекпе-жегінде жапониялық Наоя Иноуэ мексикалық Давид Пикассоны жеңіп, жанкүйерлерді дүр сілкіндірді.
Ал Роналду дәл бүгін өз командасы сапында «Әл-Ахдуд» қақпасына дубль жасап, тағы бір нәтижелі ойынымен көзге түсті.
GGG жариялаған видеода екі спорт жұлдызының жылы амандасып, аз-кем әңгімелескені көрінеді. Әңгіме барысында Геннадий Головкин келесі жылы тағы бір жекпе-жек өткізуі мүмкін екенін айтып қалады. Бұл үзінді желіде қызу талқыланып жатыр.
Қазір Геннадий Головкин 43 жаста. Оның ресми жекпе-жексіз жүргеніне үш жылдан аса уақыт болды. Соған қарамастан, видеодағы қысқа мәлімдеме жанкүйерлерге үміт сыйлағандай.