Қазақстанның үздік теннисшісі, әлемдік рейтингте бесінші орында тұрған Елена Рыбакина жаңа маусымға дайындықты күшейтті. Әлеуметтік желіде спортшының Дубайда (БАӘ) өткен жаттығу сәттері түсірілген әсерлі видео жарияланды.
Бейнежазбада Рыбакина италиялық маман Альдо Кьяримен бірге жұмыс істеп жүр. Ол қазақстандық теннисшінің командасында физикалық дайындыққа жауап береді.
Бұған дейін Рыбакинаның Brisbane International (WTA 500) турниріне қатысуға өтінім бергені хабарланған. Жарыс 2026 жылғы 4–11 қаңтар аралығында өтеді.
Өткен маусымда Елена Рыбакина екі WTA 500 турнирінде топ жарды:
Страсбург (Франция) – чемпион
Нинбо (Қытай) – чемпион
Сондай-ақ ол WTA Finals-2025 додасында (Эр-Рияд) шешуші матчта әлемнің бірінші ракеткасы Арина Соболенконы 6:3, 7:6(0) есебімен ұтып, маусымды үлкен жеңіспен жапты.