Новак Джокович теннис матчтарының форматын өзгертуге ұсыныс жасады
Сербиялық теннисші қазіргі ойын жүйесін жаңартып, кездесулердің ұзақтығын екі сағат шамасында сақтауды ұсынды.
24 дүркін “Үлкен дулыға” турнирінің чемпионы матчтардың форматын өзгерту туралы пікір білдірді. Сербиялық спортшының айтуынша, партиялардағы есеп жүргізу жүйесін қайта қарастыру қажет.
“Біз ұпай есептеу форматын өзгертуіміз керек. Сетте алты геймге дейін ойнаудың орнына төрт геймге дейін жеткізуге болады. Сонымен қатар шешуші ұпай ережесін қосып, матчтарды үш жеңіске жеткен сетке дейін өткізу қажет. Ең бастысы - кездесулердің ұзақтығы екі сағат көлемінде қалуы керек. Бұл барлығы үшін тиімді болады”, – деді Джокович Punto de Break басылымына берген сұхбатында.
Цинциннати турниріне қатысады
Жақында спортшы АҚШ-та өтетін Цинциннати “Мастерс” турниріне қатысатынын растаған болатын. Жарыс 13-23 тамыз аралығында өтеді. Сербиялық теннисші бұл турнирге соңғы рет 2023 жылы қатысып, финалда испаниялық Карлос Алькарасқа қарсы жеңіске жетіп, чемпион атанған.