Қазақстандық теннисші Қытайдағы турнирде топ жарды
06.10.2024, 17:41
Соның арқасында Әмір Омарханов әлемдегі ТОП-10 теннисшінің қатарына кіруі мүмкін. Қазір ол 15-ші орында.
olympic.kz
Қытайда жасөспірімдер арасында ITF Juniors - J300 WANJU турнирі аяқталды. Қазақстанның 18 жасқа дейінгі бірінші ракеткасы Әмір Омарханов финалдық кездесуде ұлыбританиялық Оливер Бондингпен (19 ITF Juniors) кездесіп, жеңіске жетті.
Бірінші сетте отандасымыз тай-брейкте қарсыласына жеңілгенімен, қалған екі партияда 6:0 және 6:4 есебімен басым түсіп, турнир жеңімпазы атанды.
Айта кетейік, жерлесіміз ITF Juniors турнирлерінде осымен алтыншы рет кубок иегері атанып отыр. Бұған дейін қарағандылық теннисші Таиландта (J300), Кореяда (J300), Египетте (J100), Грузияда (J60) және Қарағандыда (J60) өткен жарыстарда жеңіс тұғырынан көрінген болатын.