Елена Рыбакина командалық турнирді жеңіспен бастады

Аустралияның Сидней және Перт қалаларында аралас командалық сында United Cup турнирі өтіп жатыр. Қазақстан құрамасы С тобында Испаниямен ойнап жатыр. 
Қазақстанның бірінші, әлемнің 6-ракеткасы Елена Рыбакина алғашқы кездесуін рейтингіде 54-сатыда тұрған Джессика Бузас Манейромен өткізді.

Бірінші партияда 4:0 есебімен алға кеткен қазақстандық теннисші сол басымдықты сақтап қалды – 6:2.
Екінші сетте есеп 3:2 болған кезде Елена брейк жасады – 4:2. Содан кейін матчқа доп бергенде, өз мүмкіндігін жіберген жоқ – 6:3.

Бір сағат 18 минутқа созылған бәсеке барысында қазақстандық спортшы 5 брейк-пойнттың төртеуін пайдаланды. Испаниялық теннисші 1 брейкпен (10 брейк-пойнт) көзге түсті. 

Айта кетейік, биыл бапкер алмастырып, хорватиялық маман Горан Иванишевичпен бірге жаттығып жүрген Е.Рыбакинаның жаңа маусымдағы алғашқы ойыны.