Абиба Әбужақынова өзбек дзюдошысын тізе бүктірді (ВИДЕО)
Қазақстан әйелдер құрамасының көшбасшысы Абиба Әбужақынова Тәжікстан астанасы Душанбеде өткен Grand Slam халықаралық турнирінде ел қоржынына алғашқы жүлдені салды. Ол 48 келіге дейінгі салмақ дәрежесінде өнер көрсетіп, қола медаль жеңіп алды.
Жарысты сәтті бастаған Әбужақынова турнирдің жартылай финалына дейін сенімді жетті. Алайда бұл кезеңде ол Қытай спортшысы Вэньне Чжуаннан ұтылып қалды.
Дегенмен, жүлде үшін күресті тоқтатпаған отандасымыз үшінші орын үшін өткен шешуші белдесуде өз шеберлігін толық көрсете білді.
Қола жүлде үшін өткен белдесуде Абиба Өзбекстанның дзюдошысы Улбусин Хакимовамен татамиде жолықты. Белдесу барысында Абиба қарсыласын ұстау әдісімен тізе бүктіріп, мезгілінен бұрын жеңіске жетті.
"Абиба Әбужақынованың бұл жеңісі – оның тұрақты спорттық формасының және халықаралық аренадағы тәжірибесінің айғағы," — деп атап өтті дзюдо федерациясының өкілдері.