"Маған ақша емес, нәтиже маңызды": Сәкен Бибосынов кәсіби бокстағы алғашқы жеңісі туралы пікір білдірді
Қырғызстанда өткен алғашқы кәсіби жекпе-жегінде жеңіске жеткен Сәкен Бибосынов өзінің әсерімен және алдағы жоспарларын айтты.
“Бәрі жоспар бойынша өтті”
Сәкеннің айтуынша, кездесуде барлығы алдын ала құрылған жоспарға сай өрбіген:
“Біз дайындық кезінде бауырға бағытталған соққыларды көптеп қайталадық. Бірінші раундта осы соққымен қарсыласымды нокдаунға түсіруді мақсат еттік — бәрі дәл солай болды. Қарсыласымды толық зерттеп шықтым. Бұл жеңіс мен үшін ғана емес, бапкерлерім, жанкүйерлерім және менімен жұмыс істеген жапон промоутерлері үшін де үлкен қуаныш болды”, – деді ол.
Сәкенге кәсіби аренадан келесі жекпе-жекке ұсыныс түсіп үлгерген. Алайда ол бұл шешімді ұлттық құрама мен федерациямен келісе отырып қабылдайтынын айтты.
“Мен қазір де ұлттық құрамадамын. Сол себепті, келесі жекпе-жекке қатысты шешімді бас бапкер және бокс федерациясымен кеңесіп қабылдаймын. Егер күнтізбедегі әуесқой жарыстарға кедергі келтірмесе, кәсіби рингке де шығамын. Бапкерім екі бағытты қатар алып жүруге болатынын айтты”, – деді Бибосынов.
Жапониялық промоутерлер нақты жоспар ұсынып отыр
Кешті ұйымдастырған жапониялық промоутерлер Сәкеннің бокстағы стиліне риза болып, дүниежүзілік рейтингте тез көтерілуге мүмкіндік беретін ұсыныстар жасаған.
“Олар менің мықты қарсыластармен кездесіп, 2–3 жекпе-жектен кейін Азия чемпионы атағына, ал 4–5 жекпе-жектен соң әлем чемпиондығына таласа алатынымды айтты. Әзірге бұл — келешектің еншісіндегі әңгіме”, – деді ол.
“Ақша басты мақсат емес” — Бибосынов
Кәсіби спорттағы гонорар мәселесі жиі талқыланатыны белгілі. Алайда Сәкен бұл жайында өз ұстанымын ашық айтты:
“Мен үшін басты құндылық — нәтиже. Ақша мені қызықтырмайды. Кәсіби болсын, әуесқой болсын — бастысы жоғары жетістікке жетіп, ел намысын абыроймен қорғау”, – деді боксшы.