Бір сәтте бәрі өзгерді: Санжар Тәшкенбайдың соққысы кубалықты есеңгіретті
Қазақстандық боксшы Санжар Тәшкенбай әлем чемпионатының жартылай финалында жеңіске жетіп, финалға жолдама алды. Жарыс Англияның Ливерпуль қаласында World Boxing ұйымының аясында өтіп жатыр.
Камбэк пен нокдаун
50 келі салмақ дәрежесіндегі шешуші жекпе-жекте Тәшкенбай кубалық Алехандро Кларо Фиске қарсы рингке шықты. Алғашқы раундта Санжар ұпай айырмасымен қарсыласынан қалып қойды. Дегенмен екінші раундта ол шабыттанып, күшті соққымен кубалықты нокдаунға жіберді. Бұл сәт жекпе-жектің бағытын толық өзгертті.
Нәтижесінде төрешілердің бөлек шешімімен жеңіс қазақстандыққа берілді.
Финалға жол
Осылайша Санжар Тәшкенбай финалға шығып, алтын жүлде үшін таласады. Ал оның қарсыласы Кларо Фис жарысты қола медальмен аяқтады.
Айта кетейік, Тәшкенбай — 2023 жылғы әлем чемпионы және 2022 жылғы Азия чемпионы. Ал кубалық боксшы Фис былтырғы әлем чемпионатында қола медаль алған.