Қазақстан мен Өзбекстан боксшылары «татуласты»
Қазақстан және Өзбекстан ұлттық бокс құрамалары арасындағы басты бәсекелестік жаңа деңгейге шықты. Ливерпульде әлем чемпионатынан кейін қос елдің бас бапкерлері – Қайрат Сәтжанов пен Тулкин Киличев бір-біріне сәттілік тілеп, өзара құрмет көрсеткен сәтті желіде жариялады.
«Біз – бауырлас халықпыз»
Қайрат Сәтжанов бокс сүйер қауымға арнаған сөзінде:
«Құрметті жанкүйерлер, бізді жеңіспен құттықтаңыздар. Қазақстан мен Өзбекстан – бауыр елдер, әрқашан бірге боламыз. Үлкен басшыларымыз да: “Англияға неге келдіңдер? Екі елдің құрамасы өзара спарринг жасап, қалған орындарды басқаларға берсе жеткілікті еді ғой” деп әзілдеді. Екі мемлекетіміз әрқашан биік тұғырда болсын», – деді.
Ал Тулкин Киличев Қазақстан құрамасына құрмет білдіріп:
«Қазақстан, Өзбекстан – біз рингте бәсекелеспіз. Бірақ рингтен тыс әрқашан бір-бірімізді сыйлаймыз, біз – бауырлас халықпыз. Алла қаласа, Олимпиадада тамаша нәтижелер көрсетейік. Баршаңызға мықты денсаулық тілеймін», – деп атап өтті.
Чемпионат қорытындысы
World Boxing ұйымы аясында алғаш рет өткен әлем чемпионатында Қазақстан құрамасы жалпыкомандалық есепте бірінші орын алды. Қоржында – 7 алтын, 1 күміс және 2 қола медаль. Өзбекстан боксшылары екінші орынға жайғасты: 6 алтын, 2 күміс, 3 қола.
Бұл дода екі ел арасындағы бәсекелестіктің қаншалықты жоғары екенін тағы бір мәрте көрсетті.
Еске салсақ, Парижде өткен 2024 жылғы Олимпиада ойындарында Қазақстан тек бір күміс медальмен шектелсе, Өзбекстан құрамасы 5 алтын жүлде иеленген болатын.