Бауырластықтың үлгісі! Қазақ және өзбек боксшылары чемпионаттан кейін бірге суретке түсті
Қазақстан құрамасы әлем чемпионатын 10 медальмен аяқтап, жалпыкомандалық есепте бірінші орын иеленді. Ал Өзбекстан боксшылары 2-орынға жайғасты.
Ливерпульде өткен 2025 жылғы бокстан әлем чемпионаты қазақ боксшылары үшін нағыз триумф болды. Жалпыкомандалық есепте Қазақстан құрамасы 7 алтын, 1 күміс және 2 қола медаль жеңіп алып, бірінші орынға тұрақтады.
Чемпион атанғандар:
- Ерлер: Санжар Тәшкенбай (50 кг), Махмұд Сабырхан (55 кг), Төрехан Сабырхан (70 кг), Айбек Оралбай (90+ кг).
- Әйелдер: Алуа Балқыбекова (51 кг), Аида Әбікеева (65 кг), Наталья Богданова (70 кг).
Бұл нәтиже Қазақстанды әлемдік бокс картасында тағы бір мәрте жоғары деңгейге көтерді.
Өзбекстан мен Үндістан да үздіктер қатарында
Екінші орын Өзбекстан құрамасына бұйырды. Өзбек боксшылары 6 алтын, 2 күміс және 3 қола медаль иеленді. Ерекше айта кетерлігі, барлық алтын жүлделерді ерлер командасы жеңіп алды.
Үшінші орынды Үндістан құрамасы еншілеп, 2 алтын, 1 күміс және 1 қола медальмен жарысты қорытындылады.
Достықты паш еткен фото
Чемпионат аяқталған соң қазақ және өзбек боксшылары, жаттықтырушыларымен бірге естелікке суретке түсті. Бұл сәтті Ұлттық олимпиада комитетінің бас хатшысы Әлімжан Ақаев әлеуметтік желіде:
«Ливерпульдегі Әлем чемпионатын шулатқан қазақ пен өзбек боксшылары! Рингте - қарсылас, рингтен тыс - бауыр!!» – деп сипаттады.