Қоңқабаевтың бір ауыз сөзі желіні жарды — Джалоловқа тосын реакция!
Өзбекстандық олимпиада чемпионы Баходир Джалоловтың Instagram-дағы жазбасына қазақстандық боксшы Қамшыбек Қоңқабаев күтпеген жерден пікір қалдырды.
Қазақ боксшысы бұрынғы қарсыласына жауап берді
Джалолов Санкт-Петербург қаласында өткен IBA.PRO 10 турнирінде ресейлік Виталий Кудуховпен жұдырықтасып, жеңіске жеткен. Дегенмен сарапшылар бұл жекпе-жекті «даулы шешім» деп атады. Олар өзбек боксшысының өнеріне сын көзбен қараған.
Жекпе-жектен кейін екі дүркін олимпиада чемпионы Instagram парақшасында жақындарына алғыс білдіріп, жазба қалдырды:
«Әлхамдулилла! Маған әрдайым қолдау көрсететін туған-туысқандарыма рахмет!» — деп жазды Баходир Джалолов.
Ал дәл осы жазба астында Қамшыбек Қоңқабаев бір ауыз сөз қалдырған:
«Құттықтаймын».
Желі қолданушылары мұны «иә, сыйластық бар, бірақ астарлы жауап» деп бағалады.
Қоңқабаев Джалоловты нокаутқа жіберген жалғыз боксшы
Қазақ жанкүйерлері үшін бұл оқиға кездейсоқ емес. Себебі, Қамшыбек Қоңқабаев — Баходир Джалоловты мерзімінен бұрын жеңген жалғыз боксшы.
Бұл жекпе-жек 2015 жылы өткен халықаралық турнирде болған. Сол кезде Қоңқабаев өзбек боксшысын нокаутпен ұтқан еді.
Екі чемпион — екі жол
Содан бері екі спортшы да өз жолымен дамыды: Джалолов екі рет олимпиада чемпионы атанып, кәсіби бокста да бақ сынауда. Ал Қоңқабаев Қазақстанның намысын халықаралық деңгейде қорғап, Азия чемпионы және әлем чемпионатының жүлдегері атанды.
Көпшілік бұл өзара құрметті пікір алмасуды — «бұрынғы қарсыластар арасындағы джентльмендік байланыс» деп бағалап отыр.