Нью-Делиде (Үндістан) өтіп жатқан World Boxing ұйымдастырған әлем кубогының соңғы кезеңінде жартылай финалдық жекпе-жектер жалғасуда.
Күндізгі сессияның қорытынды жекпе-жегінде 85 келі салмақ дәрежесінде Қазақстан құрамасының мүшесі Сұлтанбек Айбарұлы мен Оңтүстік Корея боксшысы Ким Дэ Хун жолықты.
Бірінші раундта Айбарұлы кореялық қарсыласын тіреп тұрған нокдаунға жіберді. Үшінші раундта дәл осындай эпизод қайталанды. Осылайша үш раундтың қорытындысы бойынша төрешілер бірауыздан жеңісті Сұлтанбекке берді.
Бұл сенімді жеңіс Сұлтанбек Айбарұлына әлем кубогының финалына шығуға мүмкіндік берді. Ол шешуші кездесуде Өзбекстан боксшысы Жасурбек Юлдошевпен алтын жүлде үшін жұдырықтасады. Ким Дэ Хун болса, турнирдің қола жүлдегері атанды.
Үндістандағы финалдық жекпе-жектер 20 қараша күні өтеді.