2025 жылғы әлем чемпионы Төрехан Сабырхан рингтегі шеберлігімен ғана емес, оның сыртындағы мінез-құлқы және кәсіби тәртібімен де қазақстандық боксшыларға үлгі болып жүр.
Биыл 19 жастағы шымкенттік боксшы ересектер арасындағы жекпе-жектерде жеңіліс көрмей, қазақ боксының жаңа символына айналды.
Оның жекпе-жектері әрі нәтижелі, әрі көрерменге қызық – тиімділік пен шоу элементі қатар жүр.
2025 жылғы әлем чемпионатында «алтын» алған Төрехан бүгінде жанкүйерлер ғана емес, бокс мамандары ауызынан түспей жүр.
Атақты боксшы, 2005 жылғы әлем чемпионы Ердос Жаңабергенов «Виктор Ялымовтың бокс студиясына» берген сұхбатында қазақстандық боксшыларға жетіспей жатқан қасиеттер туралы айта келе, дәл Төрехан Сабырханды бөле-жара атап өтті.
Ол жас чемпионның тәртіп деңгейін кәсіби спортшы үшін эталон ретінде көрсетті:
«Мысалы, Төрехан Сабырхан. Мен білемін, сағат 22:30-да оның телефоны өшірулі болады. Міне, нағыз тәртіп деген – осы. Әкесінен алған өте дұрыс тәрбиенің нәтижесі», – дейді Ердос Жаңабергенов.