Шавкат Рахмоновқа UFC титулына таласу мүмкіндігі "берілді"

MMAMania.com шолушысы Александр Бехунин UFC-дің жартылай орта салмағындағы жағдайды талдап, Шавкат Рахмоновты әлі де №1 легитимді үміткер деп санауға толық негіз бар екенін жазды

Америкалық сарапшының пікірінше, UFC-дегі өзгерістерге қарамастан, Шавкат Рахмонов өз орнын жоғалтқан жоқ.

«Көптеген жанкүйер мен сарапшы Рахмоновты әлі де №1 үміткер санайды. Бастапқыда ол UFC 310 турнирінде Белал Мұхамедпен чемпиондық белбеуге таласуы керек еді, бірақ Мұхамед башпай жарақатына байланысты шықпай қалды», — деп жазады Бехунин.

Мұхамедтің бас тартуынан кейін Рахмонов Иэн Гэрриге қарсы шықты және ирландиялыққа мансабындағы алғашқы жеңілісті сыйлады.

Бұл жекпе-жекте Шавкаттың өзі де жарақат алды, сондықтан біраз уақыт октагоннан тыс қалуға мәжбүр болды.

Махачев – чемпион, Гэрри – №2

Рахмонов емделіп жатқан уақытта UFC-дің жартылай орта салмағында күштер теңгерімі айтарлықтай өзгерді:

• Ислам Махачев – жаңа чемпион;
• Иэн Гэрри — рейтингте №2 позицияға көтерілді;
• Камару Усман — мансабын қайта жандандыруда;
• Майкл Моралес — жылдам өсіп келе жатқан жас үміткер.